Гьаб тIехьалъ мугIалимзабазе квербакъи гьабула кIиабилеб классалъул “Авар мацI” абураб учебникалъул гIуцIи ва хIасил бичIчIизеги гьелда тIад хIалтIулеб къагIидаби лъазеги. Методикияб пособие гIуцIун буго цо чанго бутIаялдасан (разделалдасан). БутIабазда кьун руго курсалъул гIелмиялгин методикиял кьучIал, календариябгин тематикияб план, кIиабилеб классалъул авар мацIалъул курс лъазабиялъ щвезе ракIалда ругел хIасилал, 2 классалъул курс лъазабун лъугIун хадуб кьолел хIасилал (напсиял, метапредметиял ва предметиял) ва дарсазул методикиял малъа-хъваял. Курсалъул гIелмиялгин методикиял кьучIазда нилъеда ратула «Грамматикаялъул дарсазда сунде кIвар кьезе кколеб?», «Гьел дарсал кин гIуцIулел?», «Грамматикаялъул цо-цо тема кин ва кинаб тартибалда кьолеб?», «Цо-цо хIалтIи кин тIубазе кколеб?», «Калам цебетIезабиялъул хIалтIи кин тIобитIизе кколеб?» абурал суалазе жавабал. Календариябгин тематикияб план гІуцІун буго, анкьида жаниб грамматикаялъе бихьизабураб кІиго сагІатги хІисабалде босун. Гьелда тІадеги, ругьунлъиялъул изложениял ва сочинениял тІоритІизе, планалда гъорлъе уна авар мацIалъул ва адабияталъул хIалтIул программаялъ калам цебетІезабиялъул хІалтІабазе бихьизабураб ичІго сагІатги. Пособиялда кинабниги кьун буго 68 грамматикаялъул ва 9 калам цебетIезабиялъул дарс. Грамматикаялъул щибаб дарс бикьун буго гьал хадусел аслиял бутIабазде: цебехун малъараб материал такрар гьаби, цIияб материал лъазаби, гьеб щула гьаби ва рокъобе хIалтIи кьей. Дарсазда гIезегIанго дандчIвала, учебникалдаса гурелги, жеги тIадеги кьун ругел жидедаса пайдаги босизе бегьулел рухьарал текстал ва лъималазул гъира ккезабулеб материал (бицанкIаби, кицаби, абиял, кросвордал ва гь. ц.). 4 Гьединго нилъеда кIочон тун гьечIо тарбия кьеялъе авар мацIалъул дарсазул бугеб кIварги. ГIемерал бакIазда тексталда тIад хIалтIулаго, лъун руго батIи-батIиял ахIвал-хIалаздехун, хьвада-чIвадияздехун цIалдохъабазул бугеб гьоркьоблъи баян гьабиялъул суалал. МугIалимасда лъазе ккола пособиялда кьурал дарсал мисалиял рукIин. Гьев кьуричIого, гьенир ругел дарсазда рекъон, хIалтIизе кколаро. Дарсаз мугIалим хIалтIизе кколеб нух бихьизабула. Гьесул рес буго жиндие къваригIараб куцалъ гьел хисизаризе: роцен кIодо ялъуни дагь гьабизе, къваригIунареб жо гьоркьоб биччазе, кIиго дарс цолъизабизе, дарсил бутIабазе бихьизабураб заман, рокъобе кьолеб хIалтIи, тексталъулаб материал ва гь. ц. хисизабизе. Гьеб кинабго бараб буго цIалдохъабазул лъаялъул даражаялда. Къокъго абуни, щибав мугIалимасул пособиялдехун букIине бегьула жиндирго творческияб бербалагьи, хIалтIулеб къагIида.